Efast um Frey og segir hann hvorki fyrsta, annan né þriðja kost

„Ég held að Rosenborg hafi ekki fengið sinn fyrsta kost, ekki annan kost og ekki þriðja kost. Það segir svolítið sitt um Rosenborg sem félag og hve aðlaðandi það er núna,“ segir Birger Løfaldli hjá Adressavisen, í samtali við norska ríkismiðilinn NRK.

Freyr hefur á þjálfaraferli sínum erlendis náð mögnuðum árangri í að koma liðum úr erfiðri stöðu, eins og Rosenborg er svo sannarlega í núna.

Hann kom danska smáliðinu Lyngby upp í úrvalsdeild og hélt því þar þrátt fyrir afar dökkt útlit framan af tímabili.

Stórveldi í fallsæti

Hann tók svo við belgíska liðinu Kortrijk í nánast vonlausri stöðu í ársbyrjun 2024 en náði að bjarga því frá falli. Hann var engu að síður rekinn í desember sama ár og tók þá við Brann í Noregi sem var grátlega nálægt því að verða bikarmeistari í vor undir stjórn Freys, eftir að hafa sömuleiðis komist áfram úr deildarkeppni Evrópudeildarinnar í vetur og í umspil þar sem liðið féll út gegn Bologna frá Ítalíu.

Eftir slakt gengi í upphafi leiktíðar í norsku úrvalsdeildinni nú í vor ákváðu forráðamenn Brann að láta Frey fara um síðustu mánaðamót. Hann skildi við liðið í 11. sæti með 13 stig, þó ofar en Rosenborg sem er í fallsæti með aðeins 9 stig.

Rosenborg er sigursælasta lið Noregs frá upphafi, með 26 Noregsmeistaratitla og 12 bikarmeistaratitla, auk þess að hafa náð eftirtektarverðum árangri í Evrópukeppnum á árum áður. 

Finnst þetta sýna örvæntingu hjá Rosenborg

„Tröllabörnin“ mega hins vegar muna fífil sinn fegurri og hafa nú sótt tvo Íslendinga til að rétta úr kútnum því Alfreð Finnbogason var ráðinn yfirmaður fótboltamála í ársbyrjun. Løfaldli efast hins vegar um að Freyr sé rétti maðurinn fyrir Rosenborg.

„Mér finnst þetta sýna svolitla örvæntingu hjá Rosenborg. Þeir losuðu sig við Alfred Johansson og höfðu greinilega ekki skýra áætlun um hver ætti að koma í hans stað,“ segir  Løfaldli sem telur Frey ekki rétta manninn til að kalla fram þann sóknarbolta sem menn vilja sjá í Þrándheimi.

„Ég er í vafa um að hann sé maður sem getur náð því fram á Lerkendal. En hann er sjarmerandi náungi og maður sem getur náð hópnum með sér og komið upp stemningu á Lerkendal,“ segir Løfaldli.