„Al­freð er æðsti klerkur þar“

Freyr var ráðinn þjálfari Rosenborgar á dögunum og Alfreð hefur verið yfirmaður fótboltamála hjá félaginu síðan í janúar. Þeir hafa áður unnið saman, þegar Alfreð var leikmaður, og Freyr nýtur þess að endurnýja kynnin:

„Það er bara ótrúlega gaman. Alfreð er náttúrulega mjög professjonal og hefur alltaf verið það, var það leikmaður hjá mér í Lyngby, stórkostlegur þar og líka með íslenska landsliðinu,“ segir Freyr við Vísi.

„Hann er líka skemmtilegur náungi, algjör fagmaður og maður sem hefur þurft að hafa fyrir hlutunum í lífinu. Hann hefur átt stórkostlegan feril og er síðan kominn strax í þessa stöðu sem einn sá fyrsti sem fer utan Íslands í stöðu yfirmanns knattspyrnumála.

Mér finnst það líka bara mikil ábyrgð á mér að ná því besta út úr honum og ég hef mikla trú á okkar samvinnu. Það eru miklir möguleikar í því, þannig að mér finnst þetta bara spennandi og skemmtilegt og hef mikla trú á þessu,“ segir Freyr.

Þeir Alfreð eru í daglegum samskiptum og tala mikið saman, nú þegar finna þarf leiðir til að koma Rosenborg úr fallsæti og aftur meðal bestu liða Noregs.

„Já, hingað til tölum við allt of mikið saman en það er betra en ekki. Við munum vera í miklu sambandi en þurfum kannski að finna – einhvern tímann þegar við erum komnir aðeins lengra inn í samvinnuna – smá jafnvægi í því að tala ekki bara um vinnuna alltaf þegar við hittumst,“ segir Freyr.

Á þeim stöðum sem Freyr hefur þjálfað hafa íslenskir leikmenn ítrekað dúkkað upp en mun hann áfram horfa til íslenskra leikmanna í nýju starfi hjá Rosenborg?

„Ég horfi bara alltaf á góða leikmenn sem hafa rétt hugarfar en ég er með frábæran mann til að stjórna þessum takti og það er Alfreð Finnbogason sem er æðsti klerkur þar. Þannig að ég er bara honum til haldls og trausts og við gerum þetta auðvitað í sameiningu, ásamt „scoutum“ (njósnurum), þannig að góðir íslenskir leikmenn koma auðvitað til greina ásamt öllum öðrum,“ segir Freyr.