Bana­biti Brassa var þegar Ancelotti setti Neymar inn á

Í fyrsta sinn í 36 ár féll Brasilía úr leik í sextán liða úrslitum á HM eftir 2-1 tap fyrir Noregi í gær.

Neymar kom inn á sem varamaður á 68. mínútu í leiknum í gær. Ancelotti gerði frekari tilfærslur á liði sínu til að koma Neymar fyrir en það sprakk í andlitið á honum. Erling Haaland skoraði tvívegis fyrir Noreg og engu breytti þótt Neymar skoraði af vítapunktinum í uppbótartíma.

Blaðamaðurinn Tim Vickery sérhæfir sig í suður-amerískum fótbolta. Í pistli sínum fyrir BBC segir hann að Ancelotti hafi gert stór mistök með því að velja Neymar í HM-hóp Brasilíu og svo setja hann inn á í leiknum í gær.

„Svo er það Neymar. Það er á ábyrgð þjálfarans. Samhengið var vissulega ekki auðvelt. Almenningur vildi að hann yrði valinn en var blindur á vísbendingu hverrar viku um að hann væri ekki nálægt því að vera sami leikmaður og hann var,“ skrifaði Vickery.

Eins og fyrrverandi fótboltamaður

Hann segir ótrúlegt að Ancelotti hafi ákveðið að henda Neymar inn á í gær. Hann kom aðeins við sögu í sigrinum á Skotlandi en Vickery segir að þar hafi hann litið út eins og fyrrverandi fótboltamaður í góðgerðarleik.

Vickery segir að með innkomu Neymars hafi þeir Endrick og Vinícius Júnior verið færðir aftar, fjær marki Noregs, akkúrat þar sem þeir hefðu ekki átt að vera. Það hafi opnað svæði fyrir Norðmenn sem byrjuðu loks að finna Haaland sem gerði svo útslagið í leiknum.

„Neymar lauk deginum með marki úr vítaspyrnu. En hann hefði líklega átt að vera búinn að fá rauða spjaldið fyrir brot, síðustu fýlulegu tilburðina áður en hann yfirgefur sviðið. Þegar hann var upp á sitt besta var hann stórkostlegur hæfileikamaður, allt að því snillingur, en þetta eru endalokin – eins og fyrir marga í þessu aldraða liði,“ skrifaði Vickery.

Hefur spilað sinn síðasta landsleik

Eftir leikinn tilkynnti Neymar að hann væri hættur í landsliðinu. Hann lék 130 landsleiki og skoraði áttatíu mörk. Enginn hefur skorað fleiri mörk fyrir brasilíska landsliðið.

Neymar lék á fjórum heimsmeistaramótum. Hans besta mót var án vafa HM í Brasilíu 2014 en þá meiddist hann illa gegn Kólumbíu í átta liða úrslitunum. Fyrir vikið missti hann af leiknum fræga gegn Þýskalandi í undanúrslitunum þar sem Brasilía tapaði, 7-1.