Hitatölurnar hækka fyrir austan

„Það eru heitir púlsar að koma úr suðvestri og það er gangur í veðrinu. Þetta er ekki eins og stundum á sumrin þar sem hann leggst í einhvern farveg og hann er bara í einhverja viku, tíu daga eða svoleiðis veður,“ segir Einar sem ræddi málin í Reykjavík síðdegis.

Í gær fór hitinn yfir tuttugu stig á Norðaustur- og Austurlandi og sömuleiðis í dag. Þrátt fyrir að svalara loft komi yfir landið inn á milli er ekki að fara að kólna í veðri. Næsti svokallaði heiti púls mótast nú við austurströnd Bandaríkjanna og Kanada en kemur til Íslands um helgina.

„Það verður ansi hlýtt, sérstaklega á Austurlandi. Einnig gæti það farið í 20 til 25 stig þar sem best lætur,“ segir Einar.

„En það fylgir þessu dálítill vindur, sérstaklega á Norðvestur- og Norðurlandi, þá getur orðið dálítil suðvestanátt með þessu. Við þurfum að skoða það þegar nær dregur, það er svona strekkingsvindur eða allhvass vindur þegar hlýja loftið er að koma til okkar.“

Miðað við þessar veðuraðstæður mun hins vegar ekki sjást mikið til sólar á Suður- og Vesturlandi. Kaldur sjór suður af Grænlandi hafi áhrif á loftstraumana.

Ekki bara gott veður fyrir austan

Þrátt fyrir að íbúum á Suður- og Vesturlandi líði þannig þá segir Einar það ekki rétt að það sé alltaf gott veður fyrir austan.

„Ef þú ferð alveg aftur til 2015 eða svo þá getur þú fundið fréttir um vol og víl Austfirðinga um að það væri bara búið að vera þoka og leiðindi hjá þeim. Góða veðrið væri fyrir sunnan og vestan. En málið er það að það eru bara mikil áraskipti í þessu,“ segir hann.

„Ég held það hafi verið sumarið 21 sem var alveg svakalega hlýtt fyrir norðan og austan, bæði í júlí og ágúst voru sett met og maður horfir kannski til þess sem viðmiðis núna. Vissulega hafa komið góðir kaflar fyrir norðan og austan flest undanfarin sumur en það hefur líka alveg verið fínasta veður sunnan og vestanlands svona heilt yfir undanfarin sumur og það er dálítið langt síðan við höfum fengið svona sumar sem hefur verið hrakviðrasamt.“

Hitatölurnar þurfi að fara yfir 25 stiga hita til þess að Einar fari að lyfta brúnum. 

Á Suðvesturlandi má þó búast við ágætisveðri um helgina án rigningar.

„Þetta er þannig að háloftavindurinn rekur lægðardrög eða smálægðir úr suðvestri sem fara hratt yfir þannig að það er stutt á milli rigningarbakkanna.“