Starfs­hópur um gervi­greind tekinn til starfa

Starfshópinn sé skipaður sérfræðingum á sviði gervigreindar en þar sitji: 

• Hjálmar Gíslason, framkvæmdastjóri GRID, formaður
• Anna Tumadóttir, framkvæmdastjóri Creative Commons
• Ari Kristinn Jónsson, framkvæmdastjóri nýsköpunarsjóðs Atlantshafsbandalagsins
• Halldór Fannar Guðjónsson, tæknistjóri, NVIDIA
• Lilja Dögg Jónsdóttir, framkvæmdastjóri Almannaróms

Þetta er meðal þess sem kemur fram í tilkynningu á vef Stjórnarráðsins þess efnis. Með hópnum starfi fulltrúar frá forsætisráðuneytinu og menningar-, nýsköpunar- og háskólaráðuneytinu.

Hlutverk hópsins sé að meta stefnu, aðgerðir og áherslur stjórnvalda í málaflokknum heildstætt í ljósi hraðrar þróunar gervigreindar og gera tillögur um aðgerðir, forgangsröðun og úrbætur.

„Hópurinn mun einnig veita ráðgjöf um hvernig stjórnvöld geta stutt við öfluga uppbyggingu og innleiðingu gervigreindar á Íslandi og móta tillögur að samstarfi hins opinbera og atvinnulífsins um hagnýtingu gervigreindar,“ segir í tilkynningunni. 

Skipun starfshópsins byggi á grunni sem lagður sé í stefnu Íslands um gervigreind og aðgerðaáætlun stjórnvalda um gervigreind.