„Satt best að segja er mér drullusama“

Aðspurður hvort undan einhverju sé að kvarta eftir yfirburði KR-inga í leik dagsins segir Óskar:

„Ekki nokkrum sköpuðum hlut. Þetta var frábær leikur allar 90 mínúturnar. Ég get ekki annað sagt en að þetta sé virkilega öflug frammistaða frá fyrstu mínútu til síðustu.“

KR var með öll völd allan leikinn og hefði hæglega getað skorað fleiri mörk í leik dagsins.

„Hrós á drengina. Við töluðum um að við þyrftum að koma með orku. Ég hef sjálfur staðið stundum í þeirra sporum að vera með Evrópukeppnina. Það er erfitt að skipta um hatt. Þannig að við töluðum um það fyrir leikinn að við þyrftum að koma inn með alvöru orku. Það fannst mér við gera. Við hefðum átt að skora miklu, miklu fleiri mörk í þessum leik,“ segir Óskar og bætir við:

„En ég ætla ekki að kvarta yfir því. Við höldum hreinu sem er mjög sjaldséð og sjaldgæft. Það eru ellefu mánuðir síðan við héldum hreinu síðast í deildarleik. Við vorum bara mjög einbeittir allan leikinn og ég er ánægður með það.“

Sefur vel á nóttunni þó liðið haldi ekki hreinu

Eins og Óskar nefnir er KR að halda hreinu í fyrsta sinn í sumar og í fyrsta sinn í ellefu mánuði í deild. Vonast hann til að það sé styttra en ellefu mánuðir í næsta tilfelli?

„Ég er ánægðari með fimm mörk en að halda hreinu. Satt best að segja er mér drullusama um það, ef við vinnum. Ef við fáum á okkur þrjú og skorum fimm þá er það bara fínt, það er bara geggjað. Það er það sem fólk vill sjá. Fólk vill fá mörk,“ segir Óskar og bætir við:

„En auðvitað auðveldar það hlutina og við viljum verða betri í því sem við erum að gera varnarlega og þá fylgir það með að við höldum oftar hreinu. En ég sef alveg á nóttinni yfir þessu.“

KR hefur misst Amin Cosic og Gyrði Hrafn Guðbrandsson á markaðnum. Galdur Guðmundsson hefur komið vel inn fyrir Amin og Óskar hrósaði honum fyrir innkomu sína í liðið að undanförnu.

Engar Ozempic lausnir

Jason Daði Svanþórsson þreytti þá frumraun sína í dag eftir að hafa fengið leikheimild í vikunni. En Óskar býst ekki við að bæta frekar við hópinn, nema um leikmenn til framtíðar sé að ræða.

„Ég veit það ekki maður. Það er langt eftir af markaðnum. Maður á aldrei að segja aldrei en við erum ekkert endilega að leita, nema að það passi fyrir okkur þegar til lengri tíma er litið. Við erum ekki að fara í neina skyndihjálp eða að fá okkur Ozempic sprautuna til að bæta í eitthvað til skamms tíma,“ segir Óskar Hrafn.