Breskur brimbrettakappi hvarf við strendur Portúgals

Arran Strong var atvinnubrimbrettakappi í yfir tíu ár og var einn færasti frá Bretlandi. Brimbrettasamfélagið syrgir einn sinn besta kappa sem var einnig góður vinur.

Tilkynning barst til strandgæslu Portúgal um að Strong væri í vandræðum í sjónum rétt fyrir hádegi á mánudaginn. Einnig var tilkynnt að þjálfari hans sem var með honum hefði verið bjargað af veiðibát sem átti leið hjá. Þeir voru að fara um 20 kílómetra leið milli Monte Clerigo-strandar og Carrapateira-strandar.

Jose Maria Pyrrait er þjálfari hans og fór með Strong út á sjó. Hann var á undan Strong og sá ekki þegar Strong hvarf. Hann deildi upplifun sinni í færslu á Instagram:

„Ég sá brettið þitt fljóta um 100 metra í burtu. Ég kom eins fljótt og ég gat þangað og dýfði mér ofan í sjóinn til að leita, en við vorum á djúpu svæði og lítið skyggni.“

Pyrrait var í veiðibátnum í tvo og hálfan tíma að sigla um svæðið og leita en ekkert fannst. Hann þjálfaði Strong frá tíu ára aldri og því mikill missir fyrir þjálfarann sem leit á Arran Strong sem sinn eigin son. Leit var formlega hætt í gær.

Aðrir breskir brimbrettakappar vottuðu Arran Strong virðingu sína á samfélagsmiðlum en hann var mjög vinsæll innan íþróttarinnar.