Óljóst er að hve miklu leyti hægt verður að framfylgja tilskipuninni fyrir komandi þingkosningar sem fram fara í byrjun nóvember en hún hefur áhrif á getu fólks til að senda atkvæði sitt með pósti.

Á sama tíma er niðurstaða Hæstaréttar sögð opna á möguleika annarra aðila til að hefja dómsmál sem gætu tafið gildistöku tilskipunar forsetans. Nú þegar er búið að höfða önnur svipuð mál.

Lítill tími er til að gera meiriháttar breytingar á fyrirkomulagi póstkosninga þar sem sum ríki byrja fljótlega að senda út kjörseðla til kjósenda. AP-fréttaveitan greinir frá þessu.

Tilskipun Trumps var undirrituð í mars en þar er boðað að ríkisstjórnin búi til lista yfir kjörgenga einstaklinga og póstþjónustu Bandaríkjanna skipað að afhenda utankjörfundaratkvæði einungis til fólks á þeim listum. Nýjar kröfur sem gefnar voru út á föstudag myndu banna póstþjónustunni að senda utankjörfundaratkvæði frá ríkjum sem fylgja ekki tilskipun Trumps.

Þýði ekki að allar aðgerðir ríkisstjórnarinnar séu leyfilegar

Meirihluti Hæstaréttar sem samanstendur af íhaldssömum dómurum tók ekki afstöðu til þess hvort tilskipun Trumps væri lögmæt en úrskurðaði að ríkin sem höfðuðu málið hefðu ekki lagalegan rétt til að láta reyna á lögmæti hennar. Málið var höfðað af fulltrúum Demókrataflokksins í 23 ríkjum og Washington D.C. 

„Afstaða dómstólsins í þessu máli þýðir ekki að allar aðgerðir sem stjórnvöld grípa til við framkvæmd tilskipunarinnar verði endilega löglegar. Tíminn mun leiða það í ljós,“ skrifaði meirihlutinn í niðurstöðu sinni.

Þrír frjálslyndir dómarar lýstu opinberlega yfir andstöðu sinni við meirihlutaálitið.

Letitia James, dómsmálaráðherra New York-ríkis, gaf til kynna að frekari málatilbúnaður væri í vændum. Hún kallaði ákvörðunina „sársaukafullt áfall“ en hét því að þetta yrði „ekki síðasta orðið.“

Einungis fyrsta lota af mörgum

Tilskipun Hæstaréttar gerir ríkisstjórninni kleift að hefja aðgerðir til að takmarka utankjörfundaratkvæðagreiðslu en hún gæti einnig leitt til fjölda málaferla sem gætu stöðvað framgöngu hennar á ný. Nú eru aðeins tíu dagar í að fyrstu utankjörfundaratkvæðaseðlarnir verða sendir út í Norður-Karólínu.

Derek Muller, lagaprófessor við Notre Dame-háskóla, lýsir þessu sem fyrstu lotu í löngum leik í samtali við AP-fréttaveituna.

Trump hefur lengi barist gegn utankjörfundaratkvæðagreiðslu og haldið því fram að hún bjóði upp á stórfelld svik, þrátt fyrir að gögn sýni hið gagnstæða og hann hafi sjálfur nýtt sér þessa aðferð.