Liðsfélagi Alberts kominn í stríð við fé­lagið

Kean dreymir um að spila undir stjórn Cesc Fabregas í Meistaradeild Evrópu í vetur en ekki hefur náðst samkomulag á milli Fiorentina og Como um sölu.

Samkvæmt ítölskum miðlum er Kean nú farinn í hart við Fiorentina og mætti hann seint á æfingu í morgun, og ákvað svo að taka ekki þátt, eftir að hafa gefið skýrt til kynna að hann vildi komast til Como.

Þessa hegðun telja forráðamenn Fiorentina ekki boðlega enda geti leikmaður ekki haldið félaginu í gíslingu og ráðið því hvenær og hvers konar samningar nást. La Gazzetta dello Sport segir að lengst af hafi litið út fyrir að viðræður gengju vel og að allir aðilar væru sáttir en að nú virðist komið babb í bátinn.

Como mun hafa boðið 40 milljónir evra í Kean en Fiorentina á eftir að svara því auk þess sem félagið er sagt vilja finna leikmann í stað Kean áður en að sölu gæti orðið.

Ítalski fjölmiðlamaðurinn Gianluca Di Marzio segir að forráðamenn Fiorentina ætli ekki að líða aðgerðir Kean. Hann fái sekt vegna hegðunar sinnar í morgun og hafi verið skipað að mæta og æfa einn síðdegis. Hann verði aftur sektaður sleppi hann þeirri æfingu eða öðrum æfingum í kjölfarið.