Grinda­vík mokar inn verð­launum

Í þessari viku fengu þættirnir stærstu verðlaunin á einni stærstu kvikmyndahátið sem er helguð íþróttum. Það er Summer League Festival sem fór fram í síðasta mánuði í Las Vegas samhliða NBA Summer League.

Hátíðin var nú haldin í þriðja sinn og er samstarfsverkefni NBA, framleiðslufyrirtækis fyrrverandi NBA-meistarans Kevin Garnett, framleiðslufyrirtækis leikarans Mark Wahlberg og kvikmyndaframleiðandans Deon Taylor. Markmið hennar er að draga fram áhrif íþrótta á samfélagið og heiðra framúrskarandi heimilda- og kvikmyndagerð.

„Að komast í opinbert val hátíðarinnar telst mikill heiður og að vinna er enn ótrúlegra enda er samkeppnin gríðarlega sterk. Meðal myndanna sem valdar voru í ár eru þrjú verk þar sem Michael Jordan er í hlutverki viðmælanda. Þá er Charles Barkley framkvæmdaframleiðandi einnar myndarinnar og leikstjóri annarrar er jafnframt einn af framleiðendum hinnar margverðlaunuðu Netflix-seríu The Last Dance um Jordan. Heimildarmynd Amazon Prime um Lakers goðsögnina Jerry West var ein myndin til að mynda. Samkeppnin í flokknum var því gríðarleg,“ segir í tilkynningu frá framleiðendum.

Grindavík er nú búið að sópa til sín sextán verðlaunum. Tveimur á Íslandi og fjórtán á erlendri grundu. Þættirnir eru aðgengilegir á Sýn+.