Ungur Mexíkói sló heims­met Haf­þórs sem vann samt mótið

Hafþór Júlíus hafði dregið sig úr keppni á mótinu, vegna hnémeiðsla, en ákvað svo að lokum að taka þátt og endaði á að vinna sitt ellefta mót á Giants Live mótaröðinni. Hann er langsigursælastur í sögu mótaraðarinnar sem varð til árið 2009.

Engu að síður má segja að sigur „Fjallsins“ hafi verið súrsætur því fyrsta grein mótsins var um leið heimsmeistaramót í réttstöðulyftu, þar sem Mexíkóinn Raul Flores lyfti 511 kg og bætti heimsmet Hafþórs frá því á sama stað fyrir ári síðan, um aðeins eitt kíló.

Flores, sem er aðeins 26 ára gamall, hefur bætt sig ofurhratt síðustu misseri en titraði allur og skalf þegar hann hóf öll 511 kg á loft. Hann beið svo eftir merki frá dómaranum, sem reyndar var sjálfur Magnús Ver Magnússon, um að lyftan væri gild áður en út braust mikill fögnuður.

Þrátt fyrir meiðsli sín gat Hafþór Júlíus lyft 480 kg í réttstöðulyftunni og þannig endaði hann næstefstur í þeirri grein, og hlaut 11 stig.

Hafþór var svo á meðal efstu manna í öllum fimm greinum mótsins og vann á endanum öruggan sigur en hann hlaut samtals 50,5 stig, eða fimm stigum meira en Evans Nana frá Gana sem varð í 2. sæti. Tékkinn Matyás Funiok varð þriðji með 44 stig.

Hafþór var aðeins með tveggja stiga forskot á Nana fyrir lokagreinina, steinalyftu, en steig ekki feilspor þar og lyfti hverjum af steinunum fimm með fumlausum hætti á samtals 23,13 sekúndum, eða sex sekúndum skjótar en Nana.

Flores virtist hafa sett alla sína orku í réttstöðulyftuna og endaði næstneðstur í heildarstigakeppninni með 20 stig.