Gaf hundinum sínum lof­orð og sló heims­met Haf­þórs

Flores kallar sig Tayzon og er með tattú á ógnarstórum upphandlegg sínum með mynd af hundinum sem honum var svo annt um.

Hann var fljótur að benda á tattúið eftir að hafa lyft 511 kg í réttstöðulyftu á heimsmeistaramóti í Birmingham í Englandi um helgina, og þannig slegið heimsmet Hafþórs Júlíusar Björnssonar um eitt kíló.

„Í dag lét ég ekki aðeins draum rætast. Í dag efndi ég loforð,“ skrifaði Flores svo á Instagram-síðu sína og hélt áfram:

„Fyrir mörgum árum, þegar hundurinn minn TAYZON dó, lofaði ég honum að einn daginn yrði nafn hans þekkt um allan heim. Að einn daginn, í einhverri kraftakeppni, myndu menn heyra þetta nafn og vita hvað lægi að baki því.

Í dag, á sviði Giants Live Strongman, þegar ég lyfti 511 kílóunum sem gerðu mig formlega að sterkasta manni heims í réttstöðulyftu, skildi ég að ég var ekki bara að lyfta stöng. Ég var að lyfta loforði.

TAYZON er ekki lengur hér til að sjá það, en nafn hans er það. Það er á handleggnum mínum, í sögu minni, í hverri æfingu, í hverri fórn og frá og með deginum í dag, í heimssögu kraftakeppna.

Takk allir sem trúðuð á mig þegar engin met, titlar eða sviðsljós voru til staðar. Takk fjölskyldan mín, teymið mitt og hver og einn sem stóð að baki þessari vegferð. Og til þín, TAYZON… Ég lofaði þér því. Ég gerði þig frægan. Okkur tókst það.“

Flores er aðeins 26 ára gamall og því í raun rétt að hefja sinn aflraunaferil. Áhugavert verður að fylgjast með framgöngu hans en fyrir ári síðan lyfti hann í fyrsta sinn meira en hálfu tonni, eða 504,04 kg, en það var á æfingu. Mesta þyngd sem hann lyfti í keppni á síðasta ári var 480 kg.

Eddie Hall var sá fyrsti til að lyfta hálfu tonni í keppni, árið 2016, en Hafþór sló svo metið árið 2020 og hefur síðan bætt það í tvígang aftur, síðast fyrir árið síðan þegar hann lyfti 510 kg.