50skills tryggir 729 milljónir í fjár­mögnun

Í tilkynningu kemur fram að fjármagnið verði nýtt til að fjölga starfsfólki í sölu- og markaðsmálum og efla uppbyggingu notendasamfélags 50skills. Jafnframt verði áfram fjárfest í þróun lausnarinnar. Frumtak, Swiss Post Ventures, Avant og bandaríska fjárfestingafélagið DRD Investments leiddu fjármögnunina í sameiningu samkvæmt tilkynningu.

Meðal viðskiptavina 50skills hér á landi eru Icelandair, Festi, Bláa lónið, Eimskip, Domino’s, Isavia og Orkuveita Reykjavíkur, auk opinberra aðila á borð við utanríkisráðuneytið og Reykjavíkurborg.

50skills hjálpar mannauðsteymum að sjálfvirknivæða ferla, nýta gervigreind, tengja saman kerfi og draga úr handvirkri umsýslu. Fyrirtæki á Íslandi, Norðurlöndum og Bretlandi hafa framkvæmt yfir fjórar milljónir sjálfvirkra aðgerða í 50skills á undanförnum 12 mánuðum samkvæmt tilkynningu. 

Minni handavinna

Í tilkynningu segir að ávinningurinn birtist meðal annars í verkefnum sem áður kröfðust mikillar handavinnu. 

Til að mynda hafi Icelandair fært yfir 20 mannauðsferla á stafrænt form og sparað sem nemur fjögurra til fimm mánaða vinnu við umsýslu á ári. Þar séu meðal annars yfir 3.000 kvittanir vegna heilsustyrkja yfirfarnar árlega í 50 skills samkvæmt reglum félagsins.

Þá spari Air Atlanta um 50 vinnustundir á viku með sjálfvirkni í einu ferli við afgreiðslu vegabréfsáritana, sem jafngildir meira en einu fullu starfi.

Íslandshótel hafi svo stytt afgreiðslutíma umsókna um starfsmannahlunnindi um 80 prósent á 18 hótelum, mál sem áður tóku klukkustundir taka nú aðeins fimm mínútur og í sumum tilvikum þurfi mannauðsteymið ekki lengur að koma að afgreiðslunni. Þá hafi Samskip samræmt mannauðsferla fjögurra dótturfyrirtækja og sjálfvirknivætt móttöku nýliða í ferli sem telur yfir 150 aðgerðir.