Brynjar sé Lamine Yamal hand­boltans: „Hef aldrei séð annað eins“

Brynjar Narfi er aðeins 16 ára gamall og er einn af efnilegustu leikmönnum okkar Íslendinga í handbolta. 

Segja má að frumraun hans í Evrópudeildinni hafi verið frábær en hann skoraði átta mörk í spennandi leik gegn spænska liðinu Bidasoa sem lauk með sigri Spánverjanna.

Tilþrif Brynjars Narfa í leiknum voru hins vegar nokkur og hefur reikningur Evrópudeildarinnar vakið athygli á þeim í færslu á samfélagsmiðlinum Instagram.

„Enn einn Íslendingur til þess að fylgjast með,“ segir í færslu Evrópudeildarinnar og með fylgja klippur af Brynjari Narfa í leiknum gegn Bidasoa.

Brynjar Narfi varð á sínum tíma yngsti leikmaðurinn til að spila í efstu deild hér á landi, aðeins 14 ára, sjö mánaða og 15 daga gamall og sló hann þar með met núverandi þjálfara síns hjá FH, Arons Pálmarssonar.

Af því tilefni hittir íþróttafréttamaðurinn Stefán Árni Pálsson, Brynjar Narfa og föður hans þjálfarann Sigurstein Arndal. 

„Ég ætla ekki að ljúga því og mig langar alla leið. Ég geri mér líka grein fyrir því að það er svaklega vinna þar á bak við. Já, ég ætla alla leið,“ sagði Narfi í því viðtali og greindi frá því að Aron Pálmarsson væri hans fyrirmynd í handboltanum. Nú spilar hann undir hans stjórn.

Annar FH-ingur, silfurdrengurinn Logi Geirsson, segir Brynjar Narfa vera Lamine Yamal handboltans. Yamal er gulldrengur spænska stórveldisins Barcelona sem og spænska landsliðsins í fótbolta: 

„Sextán ára Haukur Þrastar var rosalegur. Þá hélt ég að geta miðað við aldur hefði náð nýjum hæðum. Svo kemur þessi nokkrum árum seinna. Hef aldrei séð annað eins. Þetta er Yamal handboltans,“ skrifaði Logi í færslu á samfélagsmiðlinum X.