Arnar bregst við banni og meiðslum: Þrír nýir með lands­liðinu til Tallinn

Miðvörðurinn Brynjar Ingi spilaði síðast fyrir Ísland árið 2024 en á að baki 17 A-landsleiki og skoraði í þeim tvö mörk. Hann er 26 ára leikmaður Sönderjyske í Danmörku og skoraði í 4-2 sigri liðsins gegn Randers í síðasta deildarleik.

Framherjinn Sævar Atli á að baki 9 A-landsleiki og lék þrjá leiki í undankeppni HM í fyrra en er svo til nýkominn af stað með liði Brann að nýju eftir afar langvinn og erfið meiðsli.

Hægri bakvörðurinn Alfons á svo að baki 23 A-landsleiki og lék síðast með liðinu í Þjóðadeildinni fyrir tveimur árum. Hann er 28 ára og spilar með Go Ahead Eagles í hollensku úrvalsdeildinni.

Ísland hefur spilað þrjá leiki á átta dögum og fyrir fjórða og síðasta leikinn í þessari törn hafa orðið skakkaföll.

Mikael Egill í banni

Ljóst er að Mikael Egill Ellertsson getur ekki spilað í Tallinn því hann er kominn í leikbann vegna tveggja gulra spjalda. Það seinna fékk hann í 3-0 sigrinum gegn Búlgaríu á Laugardalsvelli í kvöld áður en hann skoraði þriðja mark Íslands.

Daníel Tristan Guðjohnsen var í hópnum í kvöld eftir að Kristall Máni Ingason meiddist en Daníel fer núna aftur til móts við U21-landsliðið sem mætir Færeyjum á þriðjudag og þarf sigur til að geta komist í umspil um sæti á EM.

Þá ríkir óvissa um Gylfa Þór Sigurðsson sem meiddist í rifbeinum undir lok leiks í kvöld og Stefán Teitur Þórðarson kom ekkert við sögu í kvöld eftir að hafa meiðst í 3-0 sigrinum gegn Lúxemborg ytra síðasta þriðjudag. 

Áður hafði Albert Guðmundsson meiðst í fyrsta leik, í jafntefli við Eistland fyrir viku, en Þórir Jóhann Helgason verið kallaður inn í hans stað.