Ekkert fannst í búi Omnom

Omnom hf. var stofnað 2013 utan um rekstur samnefndrar sælgætisgerðar. Undir lokin var fyrirtækið í 42 prósenta eigu Óskars Þórðarsonar, Kjartan Gíslason átti sextán prósent og erlendi sjóðurinn Impact Partners Capital XI átti 42 prósent. Óskar og Kjartan voru stofnendur fyrirtækisins. 

Í fyrra var allur rekstur Omnom seldur til Góu og fengu allir starfsmenn framleiðslu fyrirtækisins boð um starf hjá Góu. Í kjölfarið var nafni Omnom hf. breytt í HR101 hf. og félagið var svo úrskurðað gjaldþrota rúmum mánuði síðar. 

Skiptafundur búsins fór fram í fyrradag og segir Anna María Gísladóttir, lögmaður og skiptastjóri búsins, að ekkert hafi fundist upp í 166 milljóna kröfur. 

Fyrir ári síðan ræddi Vísir við nokkra kröfuhafa sem sögðust hafa áhyggjur af því að fá ekki kröfur sínar greiddar úr búinu. Áhyggjur þeirra voru því á rökum reistar.