Íslensk katastrófa í Katar

Sessunautur minn í Al Sadd-höllinni í Katar í gær var blaðamaður sænska blaðsins Dagens Nyheter. Í spjalli okkar fyrir leik Íslands og Svíþjóðar spurði ég hann hvað hann óttaðist helst við leik íslenska liðsins. „Stjörnurnar þrjár,“ sagði hann. „Pálmarsson, Sigurðsson og Petersson.“

Ég kinkaði kolli. Enda hárrétt metið hjá honum. Auðvitað er það svo að sextán leikmenn þurfa að leggja hönd á plóg til að Ísland njóti velgengni á heimsmeistaramóti í handbolta en ef þessir þrír leikmenn eiga allir dapran dag í einum og sama leiknum er voðinn vís.

Enda kom það á daginn. Strákarnir steinlágu gegn sænsku liði sem nýtti sér styrkleika sína til fullnustu og gerði allt það sem maður bjóst við af liðinu fyrir leik. Leikmenn íslenska landsliðsins áttu einfaldlega engin svör við varnarleik Svía og frammistöðu Mattias Andersson markvarðar. Lokatölur 24-16 fyrir Svía.

Aron, Guðjón Valur og Alexander skoruðu samtals sex mörk úr 24 skotum í leiknum. Strákarnir klikkuðu svo á öllum þremur vítaskotunum sínum, þar af Guðjón Valur tveimur. Hraðaupphlaupsmörkin voru tvö. Það segir í raun allt sem segja þarf um þennan leik.

Nýtingin var herfileg

„Sóknarleikurinn varð okkur að falli. Við vorum of oft að spila inn á þétta miðjuna þeirra en þegar við náðum að slíta vörnina þeirra í sundur og koma okkur í færi þá var nýtingin herfileg. Bæði varði hann [Andersson] vel en fjölmörg skot fóru fram hjá og í tréverkið,“ sagði landsliðsþjálfarinn Aron Kristjánsson við Fréttablaðið eftir leik.

„Við áttum undir högg að sækja allan leikinn. Við reyndum að koma mönnum í gang en það gekk ekki. Mín bíður nú vinna við að ná sóknarleiknum í gang enda vita menn mætavel að við getum spilað miklu betur sem lið og miklu betur sem einstaklingar í færunum. Það voru margir ólíkir sjálfum sér og það er ljóst að við eigum mikið inni.“

Aron hrósaði réttilega varnarleiknum og markvörslunni. „Okkar stóra plan fyrir leikinn var að standa vel í vörninni til að gefa okkur tækifæri til að vinna leikinn. En það var ekki nóg því sóknin var of slök í dag.“

Góður varnarleikur ekki nóg

Arnór Atlason kom inn af bekknum með ágætum krafti og var markahæstur með fimm mörk. Strákarnir voru góðir í vörninni þegar þeir náðu að stilla upp og veit það vissulega á gott fyrir framhaldið því ekki verður sóknarleikurinn verri en hann var í gær.

Kim Andersson skoraði ekki fyrir Svía í gær en það kom bara ekki að sök.

Hlutfallsmarkvarsla Anderssons var 57 prósent sem er til marks um hversu vel Svíum gekk að taka bitið úr sóknarleik Íslands. Andersson bætti svo um betur með því að verja nokkrum sinnum úr dauðafærum. Ég hafði það á orði við sænska blaðamanninn að ég óttaðist helst Andersson fyrir leik og því miður var þessi magnaði markvörður í heimsklassa í gær.

Frammistaða brasilísku dómaranna í gær var auðvitað hlægileg eins og allir sáu en hún hafði engin áhrif á úrslit leiksins. Strákarnir hittu einfaldlega á dapran dag og óskandi að þeir nái að reka af sér slyðruorðið gegn Alsíringum á morgun. Það er einfaldlega nauðsynlegt.