Svíar í úrslit í fyrsta sinn

Svíar komust í dag í úrslit í fótboltakeppni kvenna á Ólympíuleikunum í Ríó eftir sigur á Brasilíu í vítaspyrnukeppni. Þettta er í fyrsta skipti sem Svíar komast í úrslit í fótboltakeppni kvenna á Ólympíuleikum frá upphafi.

Staðan var jöfn eftir venjulegan leiktíma og framlengingu og því réðust úrslitin á vítapunktinum.

Marta, aðalstjarna brasilíska liðsins, skoraði úr fyrstu spyrnu Brasilíu en Lotta Schelin jafnaði um hæl fyrir Svía. Í næstu umferð vörðu markverðirnir, Bárbara hjá Brasilíu og Hedvig Lindahl hjá Svíþjóð.

Bæði lið skoruðu úr næstu tveimur spyrnum sínum en í lokaumferðinni varði Lindahl frá Andressu. Lisa Dahlkvist átti því möguleika á að tryggja Svíum sæti í úrslitaleiknum með því skora úr síðustu spyrnu þeirra sem og hún gerði.

Svíar, sem slógu Bandaríkin út í 8-liða úrslitum, einnig eftir vítakeppni, mæta annað hvort Kanada eða Þýskalandi í úrslitaleiknum á föstudaginn.

Leikur Kanda og Þýskalands er hafinn en hann má sjá í beinni sjónvarpsútsendingu með því að smella hér.