Óli Jóh fær ekki nýjan samning hjá Val: „Mat stjórnar að nú þurfi nýjar hendur að taka um stýrið“

Ólafur Jóhannesson stýrði Val í síðasta sinn þegar liðið vann 2-0 sigur á HK í lokaumferð Pepsi Max-deildar karla í dag.

Eftir leikinn sendi Valur frá sér yfirlýsingu þess efnis að samningur Ólafs við félagið yrði ekki framlengdur. Jafnframt segir að eftirmaður Ólafs verði tilkynntur innan skamms.

Ólafur stýrði Val í fimm ár. Undir hans stjórn varð liðið bikarmeistari 2015 og 2016 og Íslandsmeistari 2017 og 2018.

Í sumar gekk illa hjá Val sem endaði í 6. sæti Pepsi Max-deildarinnar og var 23 stigum á eftir Íslandsmeisturum KR.

„Fimm ár eru langur tími í íslenskri knattspyrnu og það er mat stjórnar knattspyrnudeildar að nú þurfi nýjar hendur að taka um stýrið. Valur stendur í mikilli þakkarskuld við Ólaf fyrir árangurinn á umliðnum árum og óskar honum velfarnaðar í hverju því sem hann tekur sér fyrir hendur,“ segir í yfirlýsingu Vals. Hana má sjá í heild sinni hér fyrir neðan.