Fótboltaferillinn gekk ekki upp

"Ég þraukaði í tíu ár í fótbolta en fattaði svo að ég var lélegur," segir Sverrir Bergmann sem er allt í senn; tónlistarmaður, leikari og dagskrárgerðarmaður á Popptíví. Sverrir ólst upp á Sauðárkróki og æfði þar fótbolta á sumrin og körfubolta á veturna. "Ég varð Íslandsmeistari í körfubolta í áttunda flokki með Tindastól á Sauðárkróki. Síðan á ég pening síðan ég varð framhaldsskólameistari í körfubolta og líka einhverja silfurpeninga," segir Sverrir, sem spilar körfubolta enn þann dag í dag. "Nú spila ég í annarri deildinni með liði sem heitir UMF Glói, en það er lið frá Siglufirði. Við stóðum okkur ágætlega þetta tímabil. Við náðum settu takmarki allavega - að vinna einn leik," segir Sverrir og hlær. Fótboltaferillinn var ekki eins farsæll hjá Sverri. "Ég var ágætur í því að láta sparka mig niður en restin af fótboltalistinni var ekki að ganga upp. Nú í dag finnst mér bara fótbolti leiðinlegur þó mér finnist ágætt að horfa á hann. Það eru allt of stórir vellir og of mikil hlaup. Í körfunni er meira að gerast í einu en í fótbolta þarf maður að bíða eftir því að hlaupa eftir næsta manni," segir Sverrir en körfubolti er svo sannarlega hans íþrótt. Nóg er að gerast hjá Sverri þessa dagana þar sem hann leikur stórt hlutverk í söngleiknum Hárinu sem frumsýndur verður 9. júlí næstkomandi. Einnig var Sverrir nýlega að gefa út plötu með sveit sinni Daysleeper og að sögn hans gengur það mjög vel. "Ég er svona ágætlega ánægður með lífið en það mætti þó vera minna að gera," segir Sverrir að lokum. lilja@frettabladid.is