Leiðandi í breyttum kennsluháttum

Eitt af hlutverkum nýs Fjölbrautaskóla á Snæfellsnesi er að vera leiðandi í breyttum kennsluháttum og í nýtingu upplýsingatækni í skólastarfi. Meginmarkmiðið með þessum nýju kennsluháttum er að nám nemendanna verði skilvirkara þannig að þeir nái betri tökum á námsefninuEitt af hlutverkum nýs Fjölbrautaskóla á Snæfellsnesi er að vera leiðandi í breyttum kennsluháttum og í nýtingu upplýsingatækni í skólastarfi. Meginmarkmiðið með þessum nýju kennsluháttum er að nám nemendanna verði skilvirkara þannig að þeir nái betri tökum á námsefninu. "Notaðar verða aðferðir við kennsluna sem rannsóknir hafa sýnt að virka betur en hefðbundnar aðferðir. Þessar aðferðir eiga það sameiginlegt að megináherslan er á að nemendur séu sjálfir virkir í náminu því það hefur sýnt sig að nemendur læra mest þegar þeir þurfa vinna sjálfir í námsefninu og finna lausnir," segir Guðbjörg Aðalbergsdóttir skólameistari. Upplýsingatæknin verður nýtt á margvíslegan hátt í náminu og fléttast inn í alla þætti skólastarfsins. Verður hún notuð til að skipuleggja námið, vinna flókin verkefni fljótt og vel og til að koma vinnu nemenda á framfæri. "Nám nemendanna fer aðallega fram með verkefnavinnu og vinna nemendur ýmist einstaklingsverkefni eða hópverkefni. Kennslan fer þannig fram að hefðbundnar kennslustundir verða í bland við opna tíma og mun kennari stýra vinnu nemenda og verða þeim til aðstoðar. Kennt verður með aðstoð Angel kennsluumhverfisins og er það notað til að skipuleggja kennsluna og halda utan um allar upplýsingar fyrir hvern áfanga. Verkefnavinnan verður bæði fjölbreytt og skapandi og munu bæði kennarar og nemendur hafa aðgang að margvíslegum tólum og tækjum eins og vefdagbókum og fleiri margmiðlunartólum," segir hún. Sérstakir gestakennarar munu starfa við skólann og munu þeir kenna tiltekna áfanga en fyrirkomulag þeirrar kennslu verður með svolítið öðru sniði en staðbundna kennslan. "Angel kennsluumhverfið er þó líka notað á sama hátt í þeirri kennslu þannig að verkefnaskil og námsmat er með svipuðum hætti. Í stað hefðbundinna kennslustunda og opinna tíma munu gestakennarar koma í skólann tvisvar til þrisvar yfir önnina og hitta nemendur sína og skipuleggja námið með þeim. Að öðru leyti verða gestakennarar í tengslum við nemendur sína í gegnum Angel (tölvupóstur, spjallþræðir) og einnig munu þeir nýta sér annars konar tækni eins og fjarfundabúnað og MSN," segir Guðbjörg.