Pálmi Sigurhjartarson syndir

"Ég hef stundað sund í nokkur ár en það má nú alltaf bæta sig. Ég fer á hverjum degi og reyni að synda lágmark tvö hundruð metra. Yfirleitt syndi ég á bilinu tvö hundruð til fimm hundruð metra," segir Pálmi Sigurhjartarson, tónlistarmaður. "Ég fer á hverjum degi í sund en það er mismunandi á hvaða tímum. Ég vinn þannig vinnu að ég fer bara þegar hentar best. Síðan förum við fjölskyldan oft saman síðdegis og það er voða gott. Það er nú bara þannig að þegar ég byrjaði í sundi þá varð ég vatnsfíkill. Það hefur komið fyrir að ég hef farið að morgni og síðan aftur seinni partinn," segir Pálmi sem virðist líka vera göngutúrafíkill. "Ég bý rétt hjá Elliðavatni og finnst mjög gott að fara í göngutúr þar út í náttúrunni. Ég hef aldrei verið duglegur í þessari hefðbundnu líkamsrækt eins og að fara í líkamsræktarstöðvar. Ég einfaldlega þekki það ekki. Reyndar var ég líka frekar duglegur í fótbolta þangað til fyrir tveimur árum en þá slasaðist ég á hné og hef ekki getað spilað að ráði síðan." Mataræðið skiptir líka máli þegar kemur að heilsu og hreyfingu og reynir Pálmi að passa það sem hann lætur ofan í sig. "Ég reyni að passa mataræðið en ég er voðalega hrifinn af góðum mat. Mínusinn við mína starfsgrein er skyndibitamatur því ég þarf stundum að borða á hlaupum. En ég finn fljótt fyrir því og það stendur allt til bóta.">