Ávaxtabíllinn

"Kex eða sælgæti verður oftast fyrir valinu hjá fólki þegar hungurtilfinning vaknar seinni part dags, og þess vegna kviknaði sú hugmynd að koma ávöxtum til fólksins í staðinn. Einnig vildum við gera þetta til styrktar íslensku hugviti, því ef menn eru bensínlausir það sem eftir er dags fá þeir ekki margar hugmyndir," segir Haukur Magnússon, sem rekur Ávaxtabílinn sem selur ávaxtakörfur til fyrirtækja í áskrift. Starfsemin hófst síðastliðið vor og möttökurnar voru gríðarlega góðar en nú er kominn myndarlegur hópur fyrirtækja í áskrift. Breytilegt er eftir fyrirtækjum hversu oft í viku þau vilja fá körfu eða hvaða ávöxtum þau sækjast eftir. Þar sem ávextirnir eru handtíndir ofan í körfuna er hægt að panta ávexti í litlu magni en lágmarksgjald er 2.500 kr. á körfu. Haukur segir að verðinu sé stillt í hóf miðað við meðalverð á markaðinum og reynt sé að bjóða vöruna á sanngjörnu verði. Hingað til hefur Ávaxtabíllinn aðeins starfað á höfuborgarsvæðinu en segir Haukur að vel væri hægt að koma til móts við landsbyggðina ef sóst væri eftir því. "Stærsti kosturinn við þetta er að fólk fær á vinnustað auðveldan aðgang að hollu snakki og teygir sig frekar í einn banana en að stökkva út í sjoppu. Auk þess erum við á Íslandi ekki nógu dugleg að borða ávexti daglega og með þessu er auðveldara fyrir fólk að ná nauðsynlegum dagskammti," segir Haukur.