Einstaklingar virkjaðir

"Við erum að virkja getu hvers og eins til að takast á við framtíðina. Markmiðið hjá okkur er að aðstoða fólk sem misst hefur vinnuna vegna andlegra eða líkamlegra áfalla. Það gerum við meðal annars með því að tengja saman mennta- og heilbrigðiskerfið," segir framkvæmdastjóri Janusar - endurhæfingar, Kristín Siggeirsdóttir. Forseti Íslands afhenti starfsmenntaverðlaunum Menntar í gær í tilefni af viku símenntunar og Janus er eitt þeirra fyrirtækja sem þau hlaut. Það er til húsa í Vörðuskóla við Iðnskólann í Reykjavík og þar starfa iðjuþjálfar, sjúkraþjálfarar, sálfræðingur og félagsráðgjafi og sex kennarar Iðnskólans, ásamt læknum á geð- og endurhæfingarsviðum. Einnig hefur Íslandsbanki nýlega komið að starfinu og þar með er búið að tengja það hagkerfinu. "Við höfum tekið eftir að það eru oft fjármálin sem hindra fólk í að komast aftur út í atvinnulífið. Þessvegna fáum við sérfræðinga til að leiðbeina því," segir Kristín og heldur áfram. "Við nýtum þá innviði í þjóðfélaginu sem þegar eru til staðar og þurfum enga kastala í kringum okkur. Tengingin við Iðnskólann gerir það að verkum að allt námið hjá okkur gildir sex einingar á framhaldsskólastigi. Líka það sem heilbrigðisstarfsmenn kenna. Það eru engin próf heldur þarf fólkið bara að mæta og leysa ýmis verkefni," segir hún og tekur fram að hver og einn sem sem leiti til Janusar sé sérfræðingurinn í sjálfum sér. "Við erum bara til aðstoðar honum samkvæmt þeim áherslum sem hann þarf á að halda til að komast aftur út í þjóðfélagið. Við höfum þjónustað um 80 manns í gegnum árin og um síðustu áramót voru 38% þátttakenda komnir aftur út í atvinnulífið eða frekara nám þrátt fyrir að hafa að meðaltali verið 2 og 1/2 ár frá vinnu."