Kraftlyftingar og sjúkraþjálfun

"Orkuverið er eina stöðin á Íslandi sem getur tekið á móti öllum, frá sjúklingi upp í kraftlyftingamann," segir Georg Ögmundsson, sjúkraþjálfari og framkvæmdastjóri Orkuversins sem er ný líkamsræktarstöð í Egilshöllinni þar sem boðið verður upp sjúkraþjálfun og almenna líkamsrækt. Líkamsræktarstöðin nær yfir 1.000 fermetra og er á tveimur hæðum. Georg segir að leitast hafi verið við að skipta upp stöðinni eftir því hvaða tegund af líkamsrækt sé stunduð. "Ég geri þetta svo hver og einn hópur geti fengið næði við líkamsræktina án truflunar frá öðrum," segir Georg en stöðinni er að vissu leyti skipt í þrennt. Sjúkraþjálfuninni er ætlað afmarkað svæði en líkamsræktinni er svo skipt í tvo hluta. "Hér verður boðin aðstaða og sérstök tæki fyrir þá sem ætla sér að taka líkamsræktina alvarlega eða takast á við kraftlyftingar. Á efri hæðinni verða tæki fyrir þá sem sækja í líkamsræktina til að halda sér í formi og vilja bara láta sér líða vel," segir Georg en tækin sem sett hafa verið á efri hæðina bera vott um þægindi og fallegt útlit. "Þetta er pínulítið blúndulegt fyrir þá sem vilja ekki sjá hrá járnin ganga upp og niður á meðan verið er að lyfta," segir Georg. Orkuverið mun vera í nánum tengslum við aðra starfsemi í höllinni en fjölbreytt íþróttastarf fer þar fram. "Orkuverið er eðlileg viðbót við aðra íþróttaiðkun hér í húsinu," segir Georg.