Deilt um hvert sé rétta mataræðið

Viltu lifa lengi? Reykta kjötið um jólin hefur líklega ekki lengt lífið en vín og dökkt súkkulaði gætu hafa vegið á móti. Þeir sem gæddu sér líka á ávöxtum og grænmeti eru vel staddir því rétta matarætið gæti dregið úr tíðni hjartasjúkdóma um allt að þrjá fjórðu. Fyrir um ári var birt greini í vísindatímaritinu British Medical Journal þar sem mælt var með svokallaðri fjölpillu, það er að segja pillu sem inniheldur aspirín, fólínsýru, kólestróllækkandi lyf og blóðþrýstingslækkandi lyf. Hollenskir vísindamenn birtu í vikunni aðra grein í sama blaði þar sem þeir gefa lítið fyrir pilluátið og mæla með því að menn borði góðan mat í staðinn. Þannig megi minnka líkurnar á hjarta- og æðasjúkdómum um 76 prósent. Í stað fjölpillu mæla þeir því með fjölmáltíð sem hljómar hreint ekki ógirnilega. Hún inniheldur fisk, vín, dökkt súkkulaði, ávexti og grænmeti, hvítlauk og möndlur og áhrifin eru nánast þau sömu og fjölpillan hefur. Hundrað og fimmtíu millilítrar af víni minnka líkurnar á hjartasjúkdómum um 32 prósent, segja hollensku læknarnir. Sé fiskur á borðum fjórum sinnum í viku minnka líkurnar um fjórtán prósent. Hundrað grömm af dökku súkkulaði á dag sem og fjögur hundruð grömm af ávöxtum og grænmeti lækka blóðþrýstinginn og hvítlaukur og möndlur hafa jákvæð áhrif á kólesterólstigið. Sérfræðingarnir segja engar aukaverkanir þekktar, ólíkt því sem segja má um fjölpilluna, nema þá ef nefna á andremmu sökum mikils hvítlauksáts.