Ísland mætir Hvíta-Rússlandi

Í morgun var dregið í umspil fyrir Evrópumótið í handbolta sem fram fer í Sviss í upphafi næsta árs. Viggó Sigurðsson landsliðsþjálfari óskaði þess eins að mæta ekki annað hvort Pólverjum eða Ungverjum og honum varð að ósk sinni því Ísland mætir Hvít-Rússum. Fyrri leikur þjóðanna fer fram á Íslandi 11. eða 12. júní og seinni leikurinn í Hvíta-Rússlandi viku síðar. Drátturinn í morgun gerir það einnig að verkum að vináttuleikir Íslands og Póllands um páskana fara fram eins og áætlað var. Hefðu liðin dregist saman hefði ekkert orðið af þeim leikjum.