Beckham mun ljúka keppni á Spáni

Enska knattspyrnugoðið David Beckham segist vilja enda feril sinn hjá Real Madrid. Að sögn Beckham, sem er þrítugur að aldri, nýtur hann lífsins til hins ítrasta á Spáni en hann og kona hans, Victoria, eignuðust nýlega sitt þriðja barn. "Ég á fjögur ár eftir af samningi mínum við Real," sagði Beckham. "Þegar ég sagði skilið við Manchester United var ég viss um að ég myndi enda ferilinn hjá Real Madrid og það er einmitt það sem ég ætla að gera." Beckham telur sig eiga nokkur góð ár eftir í boltanum. "Real er eitt af bestu liðum heims og ég vil skila mínu verki eins lengi og ég get. Hér mun ég ljúka ferlinum." Beckham sagðist vita að hverju hann myndi ganga, þegar hann samdi við Real, en viðurkenndi þó að einn leikmaður hefði komið honum algjörlega í opna skjöldu. "Guti er ótrúlegur leikmaður hvað varðar sendingarhæfni og að skora flott mörk. Hann hefur komið mér mikið á óvart."