Vill hreyfingu sem meðferðarform

Gagnreyndar rannsóknir hafa sýnt að hreyfing hefur jákvæð áhrif á marga sjúkdóma og eru þar á meðal margir lífsstílssjúkdómar. Einstaklingur sem hefur verið sjúkdómsgreindur af lækni með einhvern þessara sjúkdóma ætti að geta fengið hreyfingarseðil og liti hann út eins og lyfseðill, en væri í raun ávísun á hreyfingu en ekki lyf," segir Héðinn Jónsson sjúkraþjálfari. Héðinn fer fyrir vinnuhópi á vegum Félags íslenskra sjúkraþjálfara sem vill sjá hreyfingu nýtta enn frekar sem meðferðarform. "Með þennan seðil í höndunum gæti fólk til að mynda farið til sjúkraþjálfara þar sem því er veitt ráðgjöf um hvernig hreyfing geti nýst þeim og sjúkraþjálfarinn byggt upp raunhæfa hreyfingaráætlun í samráði við einstaklinginn," segir Héðinn. "Fræðsla um hreyfingu er mjög mikilvæg því alltof margir miða við einhverja staðalímynd og telja sig eiga of langt í land og gefast strax upp. Fólk þarf einnig að átta sig á því að hreyfing þarf ekki bara að eiga sér stað inni á líkamsræktarstöð heldur ætti hún að vera hluti af lífsstíl fólks og hana þarf að miða við aðstæður hvers og eins," segir Héðinn. Hann telur það mikilvægast að einstaklingum sé hjálpað til sjálfshjálpar og að bera ábyrgð á eigin heilsu en ekki gera þá háða kerfinu. "Samhliða fræðslunni myndi vera útbúin hreyfingaráætlun sem yrði sniðin að þörfum einstaklingsins. Honum yrði veitt aðhald til að byrja með en svo yrði það minnkað smám saman þannig að einstaklingurinn geti séð um hreyfinguna sjálfur," segir Héðinn. Þetta telur hann gefa einstaklingunum meiri trú á sjálfum sér til að takast á við eigin kvilla og í kjölfarið myndu heilbrigðisvandamál minnka.