Real saxaði á Barcelona

Real Madrid sigraði Villareal með tveimur mörkum gegn einu í spænsku 1. deildinni í gærkvöldi og minnkaði forystu Barcelona í þrjú stig. Barcelona mætir Malaga á La Rosaleda vellinum í Malaga í dag. Leikurinn hefst klukkan 17 og verður sýndur beint á Sýn. Villareal náði forystu gegn Real í gærkvöldi þegar Argentínumaðurinn Juan Roman Riquelme skoraði úr vítaspyrnu. Landi hans, Walter Samuel, var rekinn útaf 20 mínútum fyrir leikslok og einum færri náði Real Madrid að skora tvívegis, fyrst Ronaldo eftir snilldartilþrif frá Zinedine Zidane. Skömmu síðar kom varnarmaðurinn Michel Salgado Real yfir þegar hann skoraði eftir sendingu frá Ronaldo. Í uppbótartíma var Zidane og fyrirliða Villareal, Quique Alvares, vísað af leikvelli. Einn annar leikur var háður í spænsku knattspyrnunni í gærkvöldi: Osasuna sigraði Atletico Madrid 1-0. Ástralinn John Aloisi skoraði markið.