Sögunni endalausu að ljúka?

Sögunni endalausu um hvort Brasilíumaðurinn Robinho gangi til liðs við Real Madrid virðist nú loks að ljúka. Á vefsíðu Real segir að að Robinho muni ganga til liðs við hið stjörnuprýdda lið þeirra þann 25. ágúst. Það er vegna þess að lið hans Santos vill að hann spili tvo leiki til að geta hvatt aðdáendur sína í Brasilíu. Real þarf að borga Santos ríflega tvo milljarða króna fyrir leikmanninn. Robinho er annar Brassinn sem gengur til liðs við Real á skömmum tíma en félagið keypti Julio Baptista frá Sevilla á rúmlega 20 milljónir evra, eða rúmlega einn og hálfan milljarð íslenskra króna.