Sigurvegarinn í Draumaliðsleiknum

Sigurvegarinn í Draumaliðsleiknum í enska boltanum hér á Vísi.is fékk í gær afhent glæsileg verðlaun fyrir góðan árangur sinn í leiknum á síðasta tímabili, en það var Jón Óskar Hauksson úr Keflavík sem varð hlutskarpastur og fær að launum ferð fyrir tvo til Englands. "Ég sá þennan leik auglýstan og ákvað að taka þátt í þessu, þó ég teldi mig nú engan sérfræðing í enska boltanum," sagði hæstánægður Jón Óskar þegar hann tók við verðlaunum sínum. "Ég komst fljótt upp á lag með það að vera ekki að skipta mikið um leikmenn í þessu, heldur hélt mig mikið við sama liðið. Það efldi mig svo nokkuð í þessu þegar ég sá að ég var hægt og bítandi að vinna mig upp listann," sagði Jón, sem sagði sigurinn koma sér nokkuð á óvart. Hann hlýtur nú að launum ferð fyrir tvo til London og við spurðum hann hvort hann færi þá ekki beint á völlinn þegar út væri komið. "Jú, ætli það ekki. Ég hef enn ekki látið verða af því að fara á völlinn, þannig að ég nýti sennilega tækifærið og skelli mér núna," sagði Jón, sem hefur haldið með Manchester City frá unga aldri, en segist einnig hafa gaman af liði Chelsea.