Heidfeld skrifar undir hjá BMW

Hið nýja BMW lið í Formúlu 1 sem hefja mun keppni á næsta ári, hefur tryggt sér samning við fyrsta ökumanninn, en það er Þjóðverjinn Nick Heidfeld sem nú ekur með liði BMW Williams, en leiðir munu skilja hjá BMW og Williams að þessu tímabili loknu. Heidfeld er 28 ára gamall og var talinn á leið út úr myndinni hjá Williams liðinu, sem er á höttunum eftir Jenson Button hjá BAR Honda. Samningur Heidfeld er til þriggja ára og tekur hann við stýrinu hjá liðinu í byrjun næsta tímabils. "Þetta er sannkallaður draumur fyrir mig og þó ég búist ekki við kraftaverkum á fyrsta keppnistímabili liðsins, veit ég að það á eftir að ná árangri í nánustu framtíð," sagði Þjóðverjinn.