Real lagði Bilbao

Áhorfendur fengu nóg fyrir sinn snúð í leik Real Madrid og Atletic Bilbao í kvöld, en leikurinn var í beinni útsendingu á Sýn Extra og er ný lokið. Real hafði sigur 3-1, en þó gekk á ýmsu áður en heimamenn tryggðu sér sigurinn. Það var Jonathan Woodgate sem kom gestunum á blað á 25. mínútu með glæsilegu sjálfsmarki, í sínum fyrsta leik í byrjunarliði í næstum eitt og hálft ár. Staðan var 1-0 fyrir gestina í Bilbao í hálfleik og áhorfendur á Santiago Bernabeu bauluðu á sína menn þegar þeir gengu til búningsherbergja. Annar bragur var á heimamönnum í síðari hálfleiknum og brasilíska ungstirnið Robinho jafnaði metin á 53. mínútu. Gulldrengurinn Raul skoraði svo svo tvö mörk á fimm mínútna kafla um miðbik hálfleiksins og tryggði liði sínu sigur. Eins og til að fullkomna martröðina í sínum fyrsta leik eftir langt hlé, lét Jonathan Woodgate reka sig af leikvelli á 65. mínútu þegar hann fékk að líta sitt annað gula spjald. Hann getur þó huggað sig við að liðið fór með sigur af hólmi, eftir að hafa tapað þremur leikjum í röð í öllum keppnum.