Arsene Wenger er eins og gluggagægir

Arsene Wenger og Jose Mourinho, knattspyrnustjórar Lundúnaliðanna Arsenal og Chelsea, munnhöggvast nú sem aldrei fyrr í fjölmiðlum og í morgun sagði Jose Mourinho að Wenger væri eins og gluggagægir að fylgjast með liði Chelsea.

"Mér finnst Wenger vera eins og gluggagægir. Honum finnst gaman að fylgjast með öðru fólki og hann er eins og einn af þessum mönnum sem sitja úti í glugga í íbúðinni sinni með kíkir og fylgist með því sem annað fólk er að gera," sagði Mourinho, sem hefur fengið nóg af athugasemdum þess franska um lið Chelsea og spilamennsku þess.

"Hann virðist ekki geta hætt að tala um Chelsea. Kannski vill hann starfið mitt, því hann virðist elska Chelsea, ekki talar hann um annað," sagði Mourinho.