Vill sættast við Wenger

Jose Mourinho segist vera alveg tilbúinn að sættast við kollega sinn Arsene Wenger hjá Arsenal með því að biðjast afsökunar á því að hafa kallað hann gluggagægir í viðtali fyrir stuttu, en aðeins með þeim skilyrðum að Wenger biðjist afsökunar á ummælum sínum um Chelsea.

"Ég skal biðjast afsökunar ef hann gerir það," sagði Mourinho. "Ég vil árétta að þetta hefur aldrei verið persónulegt frá mér séð. Ég ber virðingu fyrir honum bæði sem manni og sem knattspyrnustjóra, en hann þarf líka að biðjast afsökunar á sumu af því sem hann hefur sagt. Hann sagði til dæmis að ég myndi aldrei vinna nema einn meistaratitil á Englandi, sem mér finnst dálítið fyndið, því ég get nú ekki unnið deildina nema einu sinni á ári," sagði Mourinho.