Ronaldo, Baptista og Zidane klárir gegn Barcelona

Real Madrid er nú óðum að fá stjörnur sínar til baka úr meiðslum fyrir leik ársins í spænska boltanum á laugardaginn, en þá mætast erkifjendurnir Barcelona og Real Madrid í uppgjöri stórliðanna á Spáni.

Julio Baptista er að ná sér af hnémeiðslum sínum og talið er víst að landi hans Ronaldo verði orðinn góður af ökklameiðslum og geti spilað. "Ef ég væri meiddur, yrði ég fyrsti maðurinn til að viðurkenna það, en ég er allur að koma til og verð klár á laugardaginn," sagði Baptista. "Ronaldo er líka að braggast og hann hefur fengið lengri tíma en ég til að jafna sig, svo að við við verðum báðir klárir, enda viljum við báðir spila þennan leik," sagði hann.

Zinedine Zidane og Ivan Helguera eru einnig farnir að æfa á fullu eftir meiðsli og ættu að verða klárir, en Jonathan Woodgate og Thomas Gravesen verða frá vegna meiðsla.

Osasuna er óvænt í toppsæti spænsku deildarinnar með 24 stig, en Barcelona hefur hotið 22 stig og Real er í þriðja sætinu með 21 stig.