Landslið Tyrkja og Svisslendinga eiga ekki von á góðu frá Alþjóða Knattspyrnusambandinu eftir að uppúr sauð milli leikmanna og starfsmanna þegar þeir gengu af velli eftir viðureign liðanna í gær.
Stephane Grichting, leikmaður svissneska liðsins var fluttur á spítala eftir átökin og Sepp Blatter, forseti FIFA, átti ekki til orð til að lýsa vanþóknun sinni á uppþotinu.
"Það er eitthvað verulega mikið að. Ég hef aldrei séð annað eins," sagði Blatter. Sérstakur blaðamannafundur hefur verið boðaður í dag til að ræða atvikið og þar verður væntanlega tilkynnt til hvaða aðgerða verður gripið til að taka á þessu ljóta atviki.
