Snertir rekstur Bakkavarar lítið

Breska matvælafyrirtækið Northern Foods sendi frá sér afkomuviðvörun í annað skipti á árinu en félagið er einn helsti samkeppnisaðili Bakkavarar í kældum matvörum í Bretlandi.

"Við erum sjálfir búnir að birta tölur fyrir síðasta ár sem sýndu methagnað og höfum sagt að horfurnar séu góðar. Northern Foods hefur átt við ákveðin rekstrarvandræði að stríða, sem það er að vinna sig út úr, og kemur okkur í sjálfu sér ekkert við," segir Ágúst Guðmundsson, stjórnarformaður Bakkavarar.

Það kemur Ágústi ekki á óvart að Northern Foods skuli gefa tilkynningu sem þessa, enda hafi mikil endurskipulagning átt sér stað innan veggja þess.

Hann getur ekki sérstaklega tekið undir þá skýringu að breytt neyslumynstur sé að draga úr sölu Northern Foods en samkeppni félaganna liggur meðal annars í eftirréttum, frosnum pitsum og salati. Að mati stjórnenda Northern eru breyttar neysluvenjur að draga úr hagnaði en neytendur hafa dregið úr kexáti og fært sig í hollari bita.

Á fyrstu tveimur mánuðum ársins dróst salan hjá Northern saman um tólf prósent frá sama tímabili í fyrra og hefur gengi hlutabréfa félagsins hrunið um tæp 30 prósent frá áramótum.