Frumvarpið gæti tekið breytingum í nefnd

Sex umsagnir hafa borist efnahags- og viðskiptanefnd um frumvarp til laga um aðgerðir gegn peningaþvætti og fjármögnun hryðjuverka. Pétur Blöndal, þingmaður Sjálfstæðisflokks og formaður nefndarinnar, útilokar ekki breytingar á frumvarpinu með hliðsjón af umsögnum sem borist hafa.

„Þetta gengur ansi langt inn á réttindi einstaklinga og ef til vill hafa menn ekki gefið því nægan gaum,“ segir hann, en samkvæmt frumvarpinu ber hverjum þeim sem tekur við greiðslu yfir 15 þúsund evrum að halda eftir upplýsingum um viðskiptin og krefja þann sem greiðir um skilríki.

Þá eru lagðar á ríkar skyldur um tilkynningaskyldu í viðskiptum þar sem grunur leikur á að rekja megi til peningaþvættis eða fjármögnunar hryðjuverka. Pétur segir þarna ekki síst lagðar miklar kvaðir á fjármálafyrirtæki um að upplýsa um viðskipti einstaklinga.

Umsagnirnar sem borist hafa eru frá Sambandi íslenskra tryggingafélaga, Samtökum starfsmanna fjármálafyrirtækja (SÍB), Viðskiptaráði Íslands, Ríkisskattstjóra, Seðlabanka Íslands, og Félagi löggiltra endur­skoðenda. Frestur til að skila inn umsögnum rann út 20. þessa mánaðar, en alls voru sendar út 36 umsagnarbeiðnir.

Von er á sendinefnd stofnunar sem starfar á vegum OECD og fjallar um aðgerðir gegn alþjóðlegu peningaþvætti, en iðnaðarráðherra hefur lýst því yfir að bregðast þurfi við af fullum þunga til að uppfylla tilmæli í 40 liðum sem stofnunin hefur gefið út.

Pétur segir að vel geti verið að koma sendinefndarinnar hafi flýtt því að frumvarpið var lagt fram, en telur það fyrst og fremst gert til að koma hér í lög tilskipun Evrópusambandsins. Svo er löggjöf í þessa veru í gangi víða um heim, enda vilja menn ekki sjá svona starfsemi hjá sér.

Pétur telur að ekki sé hægt að segja til um hvenær takist að afgreiða málið, sem enn er til skoðunar hjá nefndinni og bíður annarrar umræðu á þingi.

„Ég sé enga ástæðu til að einhver stjórnarmál klárist ekki, þótt það gerist kannski ekki fyrr en eftir kosningar. Það er ekkert náttúrulögmál að Alþingi sé stopp út af bæjarstjórnarkosningum.“