Á eftir að sýna mitt rétta andlit

Framherjinn Hannes Þ. Sigurðsson hjá Stoke City í Englandi er á batavegi eftir ökklameiðsli og vonast til að fá tækifæri í byrjunarliði liðsins um næstu helgi.

"Það er aldrei óskastaða að kom til nýs félags og verða strax fyrir meiðslum. En meiðsli eru hluti af leiknum og þeim verður að taka," sagði Hannes við opinbera heimasíðu Stoke í gær en hann kom til félagsins frá Viking í sumar.

"Þegar þú kemur í nýtt lið skiptir miklu máli að sýna stuðningsmönnunum hvað þú getur. Það hef ég ekki ennþá getað gert en vona að meiðslin séu nú að baki svo að þeir sjái hvað ég kem með til liðsins. Ég er heill núna og vonast til að fá að spila meira í næstu leikjum," segir Hannes.