Bergkamp gefur kost á sér í leikinn á Spáni

Hinn flughræddi framherji Arsenal, Dennis Bergkamp, segist ætla að gefa kost á sér í fyrri leik Arsenal gegn Real Madrid í Meistaradeildinni í næstu viku, en hann fer sjaldan í keppnisferðalög með liðinu í Meistaradeildinni því hann neitar að fljúga.

"Ég er klár í leikinn á Spáni, en það er undir stjóranum komið hvort hann vill nota mig. Ég er til í að spila, en hef svosem ekkert þangað að gera ef ég er ekki notaður í heimaleikjunum heldur," sagði Bergkamp og vísaði til þess að hann hefur ekki átt fast sæti í liði Arsenal í vetur. "Það er afar mikilvægt fyrir okkur að ná að skora á Bernabeu í fyrri leiknum. Ef okkur tekst það, erum við í góðum málum fyrir síðari leikinn," sagði Hollendingurinn.