Rijkaard stillir til friðar

Frank Rijkaard, þjálfari Barcelona, vill að stuðningsmenn Barcelona sýni Jose Mourinho og lærisveinum hans í Chelsea virðingu og taki vel á móti þeim þegar liðin mætast á Nou Camp í meistaradeildinni annað kvöld, en leikurinn verður sýndur í beinni útsendingu á Sýn.

"Ég vona að stuðningsmenn okkar taki vel á móti Chelsea þegar liðið stígur inn á völlinn annað kvöld og ég vil engin ólæti. Við gengum í gegn um svoleiðis vegna eins leikmanna okkar (Samuel Eto´o) fyrir skömmu og erum búnir að fá nóg af því. Þar fyrir utan starfaði Mourinho eitt sinn hérna hjá Barcelona og stóð sig vel, svo ég sé ekki af hverju fólk ætti að taka illa á móti honum," sagði Rijkaard.