Við förum í úrslitaleikinn

Hinn ungi Cesc Fabregas hjá Arsenal segist þess viss að liðið muni fara alla leið í úrslitaleikinn í Meistaradeildinni, en Arsenal mætir löndum hans í Villareal frá Spáni í undanúrslitinum. Fabregas hefur farið á kostum með Arsenal í Meistaradeildinni en vill ekki vera borinn saman við Patrick Vieira, fyrrum leikmann liðsins.

"Auðvitað förum við alla leið í úrslitaleikinn í París. Við höfum slegið Ajax, Real Madrid og Juventus út úr keppninni, svo af hverju ættum við ekki að komast alla leið. Villareal er með gott lið og spilar sóknarknattspyrnu eins og við, þannig að þetta verður væntanlega frábært undanúrslitaeinvígi," sagði Fabregas, sem vill ekki vera borinn saman við Patrick Vieira.

"Ég vil ekki vera borinn saman við hann, Patrick er allt öðruvísi leikmaður en ég. Það var frábært að spila eitt ár með honum og hann kenndi mér mikið, en hann er Patrick Vieira - einstakur leikmaður á sinn hátt. Ég vil frekar fara mínar eigin leiðir," sagði Spánverjinn ungi.