Ráðning McClaren staðfest

Nú hefur loks verið staðfest að Steve McClaren taki við stöðu þjálfara enska landsliðsins af Svíanum Sven-Göran Eriksson eftir HM í Þýskalandi í sumar, en blaðamannafundur stendur enn yfir í Lundúnum. "Þetta var of gott tækifæri til að hafna því," sagði McClaren.

Hann tekur formlega við liðinu þann 1. ágúst í sumar og hefur skrifað undir fjögurra ára samning. "Þetta er mesti heiður sem þjálfara getur hlotnast og því er þetta auðvitað stærsta stundin á ferlinum. Það verður gríðarleg áskorun að taka við landsliðinu og ég fagna þeirri áskorun. Ég hef átt góðar stundir í starfi hjá Middlesbrough og er þakklátur félaginu, en þetta var hinsvegar tækifæri sem ég gat ekki hafnað," sagði McClaren.