Miami lagði New Jersey

Dwayne Wade lét ekki olnbogaskot og blóðugt andlit stöðva sig á lokasprettinum í nótt þegar hann tryggði Miami góðan útisigur á New Jersey Nets í undanúrslitum Austurdeildarinnar 103-92. Þetta var fyrsti leikurinn í einvíginu sem talist gat spennandi, en það var Wade sem gerði gæfumuninn fyrir Miami þegar hann skoraði helming 30 stiga sinna í leiknum á síðustu fjórum og hálfri mínútunni.

Dwayne Wade skoraði 30 stig, gaf 10 stoðsendingar og hirti 7 fráköst fyrir Miami, Shaquille O´Neal skoraði 19 stig og hirti 9 fráköst og Antoine Walker skoraði 16 stig.

Vince Carter skoraði 43 stig fyrir New Jersey, en gerði nokkur dýr mistök á lokasprettinum, Richard Jefferson skoraði 17 stig og Jason Kidd skoraði 10 stig, gaf 12 stoðsendingar og hirti 8 fráköst.

Miami leiðir nú 2-1 í einvíginu og næsti leikur fer einnig fram á heimavelli New Jersey.