Bell missir af næsta leik með Phoenix

Skotbakvörðurinn Raja Bell hjá Phoenix Suns verður ekki með liðinu í öðrum leik úrslitaeinvígisins við Dallas Mavericks eftir að hafa tognað illa í leik liðanna í nótt. Josh Howard hjá Dallas sneri sig á ökkla í byrjun leiksins og kom ekki meira við sögu eftir það, en um helmingslíkur eru taldar á að hann verði með í næsta leik.

Meiðsli Bell eru nokkuð áfall fyrir Phoenix, því hann er þeirra besti varnarmaður. Leandro Barbosa mun taka stöðu hans í byrjunarliðinu annað kvöld, en Phoenix vann einmitt sjötta leikinn gegn LA Lakers í fyrstu umferðinni án Bell og þar stóð Barbosa sig mjög vel. Shawn Marion hjá Phoenix sneri sig reyndar líka á ökkla undir lok leiksins, en hann hefur lofað að spila annan leikinn og bar sig vel á æfingu í dag þar sem hann sat með ís límdan við löppina á sér.

Þess má að lokum geta að sjónvarpsstöðin Sýn hefur beinar útsendingar frá úrslitakeppninni á sunnudagskvöldið og þar mun væntanlega verða á dagskrá leikur úr einvígi Dallas og Phoenix, en það verður nánar kynnt hér á Vísi þegar nær dregur helginni.