Benitez mætir Koeman á ný

Rafa Benitez, stjóri Liverpool, mun í kvöld reyna að forðast að tapa fyrir liði undir stjórn Ronald Koeman annað árið í röð í meistaradeildinni þegar Liverpool mætir PSV Eindhoven. Koeman stýrði liði Benfica á síðustu leiktíð þegar liðið sló Liverpool úr keppni, en viðureign PSV og Liverpool í kvöld verður sýnd beint á Sýn.

"PSV er sterkt lið með reyndan þjálfara og mér er í fersku minni þegar Benfica sló okkur úr keppni undir hans stjórn og ég verð að reyna að laga þá minningu með sigri nú," sagði Benitez. Leikmenn Liverpool eru nú að sleikja sárin eftir slæmt tap fyrir grönnum sínum í Everton í ensku úrvalsdeildinni um helgina og Benitez fagnar því að fá leik strax til að reyna að rífa sína menn upp.

"Menn verða auðvitað að fá leik til að rétta úr kútnum eftir svona lagað og þá er nauðsynlegt að ná sigur - það er svo einfalt. Ég vona að ég sjái ekki mikið af mistökum í okkar leik og sem knattspyrnustjóri vill maður sjá menn bæta sig í hverjum leik."