Toshiba innkallar rafhlöður

Japanska hátæknifyrirtækið Toshiba ætlar að innkalla um 340.000 rafhlöður fyrir tvær gerðir fartölva frá fyrirtækinu um allan heim. Sony framleiddi rafhlöðurnar og er þetta þriðja stóra innköllunin á rafhlöðum frá fyrirtækinu síðan um miðjan ágúst.

Rafhlöðurnar eru í fartölvum Toshiba af gerðunum Dynabook og Dynabook Satellite, sem framleiddar voru á milli mars og maí á þessu ári.

Ástæðan er sú að rafhlöðurnar geta tæmst skyndilega. Ekki er um að ræða innköllun vegna eldhættu frá rafhlöðunum líkt og kom upp þegar Dell og Apple innkölluðu tæplega 6 milljónir rafhlaða um allan heim.

Talsmaður Toshiba vildi hvorki láta hafa eftir sér hvað innköllunin geti kostað fyrirtækið né hvort kostnaðurinn falli á Sony.

Sony hefur reiknast til að fyrri innkallanir á rafhlöðum muni kosta fyrirtækið á bilinu 20 til 30 milljarða jena eða jafnvirði rúmlega 12 til 18,2 milljarða íslenskra króna.