Drogba er funheitur

Jose Mourinho var skiljanlega í skýjunum yfir framherja sínum Didier Drogba eftir leikinn við Levski Sofia í Meistaradeildinni í kvöld, en Fílstrendingurinn sterki skoraði þrennu í 3-1 sigri Chelsea í Búlgaríu.

"Drogba er funheitur núna og skorar grimmt bæði í Evrópu og í deildinni. Hann er ekki bara að skora grimmt, heldur vinnur hann vel fyrir liðið og þetta er því frábær dagur fyrir hann og liðið," sagði Mourinho í samtali við Sky sjónvarpsstöðina eftir leikinn í kvöld.

Drogba sjálfur er ekkert að missa sig þó hann hafi verið iðinn við kolann undanfarið og hafi skorað 7 mörk í 8 leikjum á tímabilinu. "Ok, ég skoraði þrennu í kvöld og er sáttur við það, en það mikilvægasta er að við náðum í þrjú stig á útivelli í Meistaradeildinni. Það er engu að síður gaman að ná að skora sína fyrstu þrennu fyrir liðið, því ég hef verið að keppast við að ná þeim áfanga síðan ég gekk í raðir Chelsea. Mér líður vel á vellinum og nýt mín til fullnustu þessa dagana," sagði Drogba.

Jose Mourinho viðurkenndi að lið sitt hefði þó ekki spilað sérlega vel í Sofia í kvöld og benti á að þrátt fyrir sigurinn væri enn langt í land með að komast upp úr riðlinum erfiða.

"Ef Bremen fær sex stig úr leikjum sínum gegn Levski er ég hræddur um að þessi riðill verði gríðarlega erfiður. Ég held að við þurfum að minnsta kosti tíu eða ellefu stig til að fara áfram úr þessum riðli. Við erum enn að bæta okkur sem lið og höfum unnið sex síðustu leiki okkar án þess að spila sérlega vel - svo við erum líklega í ágætri stöðu eftir allt," sagði Mourinho.